Prieês
Une mins vreugtj aan zien vraw: Waat zoojse daon as ich ‘ne prieês inne lotto haaj gewonne? Zeet die vraw: ich zooj de helft opeise en uch verlaote, want ich bin uch herstikke käök. Fantastisch, zeet hae: ich heb 12 euro gewonne, heej hebse 6 euro en noow maak dich mer ewég. Zooj d’r op de pastoeërschipperstraot ouch emes boete de deur zeen gezatte?
Trimsalon
Wiszje det d’r oppe Dieëkerstraot ’n katte en kniens trimsalon is. Ut kan ouch beej uch thoês. Zooj zeuj ouch brazilian wax doon, det is hendjig, dan ki-jje eur poes ouch effe laote doon!
Knuîp
Peter is aan ’t probere zien hûmme tow te knuîpe. Hae stieët wat te hâmpele. Gieët ’t vreugtj Ellen. Wat is det toch vör ’n hûmme, dao zitte ângersum knuîp aan. Jah zeet Ellen, ’t schiltj as desse ’t neet binnesteboete aan deust.
Bândj
’t is zaoterdigmiddig en Ilse dînktj, ich gaon mer ens nao Peter Stultiëns um mien wintjerbândj d’r op te laote zette, want ’t weurdj noow toch lânksaam aan echt kaod. Ze goesj de bândj inne wage, en hup d’r haer. Dao aangekome vreugtj ze aan Peter of daew tiêd heet um de bândj te verwissele.
Dae begintj keihaard te lache en ruptj door de hieël wêrkplaats : Minse hejje dit al ens oeëts mej gemaaktj, det noow aemes zien zomerbândj d’r op wiltj laote légke. Ilse waas zoeë drök met verbouwe det ze inne zomer vergaete waas de wintjerbândj d’r aaf te laote hale!
Krûmpe
Renate waas met Ellen aan ’t kalle over aojer waere en dejje dan gaotj krûmpe. Weej wae beej os thoês aan ’t verbouwe ware en d’r ’n vlizotrap mos waere ingebouwdj hebbe Peter en ich gemaete of ich aan ’t touw kos um de vlizotrap umlieëg te doon.
Toen ging det prima, mer noow mot ich toch echt ’n klein spröngske make um aan det touw te kome.
Det zetj ’n mins aan ’t dînke: zooj Renate echt gekrômpe zeen of zooj Peter ’n knuîpke in ’t touw hebbe gelagdj?
Iêsbaer
Wisjae det ze beej de Paol ’n noow concept vör te kiene hebbe uutgevônge? Namelijk iêsbaer kiene.
De aojervereîniging most met ’t kiene op woonsdigmiddig de winterjas aan haoje zoeë kaod waas ’t d’r.
Eike
Annie meindje det d’r inne aanslaag woord gepleegtj beej heur inne keûke. Bart haaj zin in ’n eike en zoot d’r ’n paar oppe aanrék ligke, die haaj Annie ’n paar oor geleje gekooktj, dus noow ware ze kaod. Bart vingtj ze wêrm toch lekkerder dus dae dacht, laot ich die mer ’s inne magnetron doon.
’n Paar minute en dan heb ich ’n lekker wêrm eike.
Obbèns ‘nne slaag, waas mich det eike dao toch ontploftj. Door die ontploffing zoot d’r dus ‘nne behuurlikke aanslaag aane binnekant vanne gepantserdje roêt.
Griekenlând
Britt en Lynn ginge same mét twieë vrindinne op vekânsie nao Griekenlând. Bekans alles leep op rölkes. BEKANS alles, want as ‘t op bösse aankeumtj , haaje zeuj toch wel wat pech. De ieërste kieër det zeuj métte bös ginge, wore zeuj te laat, umdet emes eur zonnebril woor vergaete. Dan pakke vae toch gewoeën de volgendje bös…..dae pas drej oor later zooj gaon.
Eur twieëdje reis waas nao ’t drökke stedje Bodrun in Turkije nao ’n shoppingcenter. De haerweêg verleep snel, mer de trökweêg… Zeuj wooje oppe tiêd trök, want zeuj móste de boeët nao Griekelând hale. Mer de zjuuste bös vînge waas ’t probleem: bösse stopdje neet of ginge neet nao Bodrun, mer as zeuj de straot overgestoke wore, haaje zeuj de zjuuste kinne pakke. Dit waas neet eur léste avontuur.
Zeuj zooje opgehaald waere beej eur hotel door ’n transferbös um nao ut vleegvêldj. Mer jèh, wi-j laat zooje zeuj opgehaaldj waere? Det stóng nêrges vermeldj en zeuj haaje gein bericht gekrege met de pick-up-time. Britt en Lynn nao de recepsie geloupe, nao hoês gebeldj, drej Griekse nummers gebeldj. Beej ut léste nummer lukdje ‘t. Britt en Lynn zeen weer veilig in Nederlând aangekome.
Pekskes
Twieëdje körsdaag ging Willem beej Petra ’t körsdiner nuttige met nog ’n deîl man. Nao ’t aete ginge ze nog wat pekskes uut pakke. Ze haaje leutjes getrokke en ederein mocht opschriêve wat hae gaer wooj.
Willem haaj zich ’n aanvüllendj pakket gevraogdj van ’t spel escape room en det haaj hae dus ouch gekrege, want det veel fein in ’t opgegaeve budget.
Mer toen kwaam hae erachter dette det spel escape room zelf neet haaj: aan zien kadootje haaj hae hieëlemaol niks. Dus toen mer nao de wînkel um det spel alsnog te koupe.
Heiknuiter bieëldj
De lêmpkes van ’t heiknuiter bieëldj wore kepot det waas Broer opgevalle. Broer gieët nao Piet haer um dao de situatie uut te legke, dae zeet det zal waal aan de trafo ligke, dus hun same nao Harry haer , jao zeet hae det zooj inderdaad waal aan dae trafo kinne ligke. As dejjae ‘ne heftruck regeldj maet ich um waal door.
Pieter kos mét de heftruck kome um ’t bieëldj d’r aaf te hale en toen koste ze de trafo d’r uut hale en Harry kos um doormaete. Niks aan de hând met det dingk zeet Harry. Kieëk dan mer ’s nao ’t lêmpke misschien is det kepot en jaowaal dus bieëldj weer oppe sokkel noow lêmpke d’r in en klaor.
Haaje vae det mer innegang gedaon dan haaj ich vanmiddig nog fein met Til kinne gaon wândele.
Knöpke
Laurens haaj al ’n paar daâg aan de preense steek met lêmpkes vör aan de gaevel gewerktj, want nao 10 jaor kos dae waal wat leefdje gebroêke. Weej ze eindelik klaor waas, ging hae ze same met preens Boy ׀ oppe gaevel make ,dao mos toch echt ‘ne hoeëgwerker aan te pas kome. ’t Waas kaod en ’t begos ouch nog te reîngele, dus neet echt fein dao bove in det bäkske. Mer inéns ging de motor van det dingk uut. Stonge ze dao lekker te kieke met twieë man inne kaoj. Jenny en Mart stonge onger te kieke, dus Jenny die ging mer ff binne kieke of d’r ‘ne stop uutloog.
Det waas neet ’t euvel. Toen Mart mer nao de graasj um wat zekeringe van dae hoeëgwerker door te maete, dju ouch niks mej aan de hând. Jenny dacht det deurtj waal erg lang allemaol, ’t waas al ’n half oor wieter ich gaon mer ’n leî-jer hale , dan kinne de manne via de slaopkamerraam weer nao binne. Mer veur det Jenny trök waas haaj Boy ’t euvel al gevonge: hae haaj per ongelök op de noeëdstop gedowdj. Tja en dan stoptj det dingk d’r dus mej!
Trawwe
Nadih en Noud woorte ’t borebroêdspaar van 2020 dus moste d’r fotoos waere gemaaktj. Det zooj op ‘ne zoondig mêrge êrges in december smerreges um 10 oor gebeure. ’t Boregezelschap zooj zich um half 10 verzamele zoeë det ze um 10 oor innegang aan de slaag koste.
Mer um half 10 geine Noud te bekinne, de anger begoste al zenuwechtig roond te trei-je. Kwart vör 10 nog niks, dus toen mer gebeldj mer Noud pakdje de tillefoon neet op. Toen Fred mer gebeldj det waas de einigste dae wist det Noud en Nadine borebroêdspaar zoje waere.
Dae heet toen snel Noud uut bed geraokeldj. Mer good det dit trawwe vör de onecht waas, anges haaj hae innegang in ’t begin van hun huwelijk al royaal wat min pûnte gescoordj!
Verbawwe
Christyl en Chiel zeen eur now hoês in Wieërt aan ’t verbawwe. Mer det gieët neet altiêd zoeë hieël good. Ze haje ’n moor aafgebroke en ’n leiding d’r uut gehaaldj en det pofdje waal hieël erg met as gevolg det ’t alarm aafging. In heur koup contract stong det det dingk ’t neet deej, mer det klopdje dus neet. Weej mot det dînk uut, want ich waer herstikke gek van det geluid zeet Chrystel. Ich weit gein code van det dînk , mer ich probeer waal wat , zeet Chiel. En jao huur det dînk stoptj met piepe. Dus ze koste de boel op gaon ruûme. Chrystel gieët de rest vaege, en jao huur dao gieët dae pongel weer aaf de hieël buurt kos ’t huuëre.
Toen de firma van det dînk gebeldj en die haaje ’n gooj tip: schroef ’t alarm eraaf en dan is ’t opgelostj. Oke toen det mer gedaon en jao huur “stil”. Zeuj koste wieter met verbawwe. ’T Leêkdje êrges water. Det mos dus auch opgelostj waere. De monteur stong inne gângk en reep nao onger want Chrystel en Chiel zote inne kêlder. Zal ich de wc doortrekke dan kinne vae huuëre woeë ’t leêktj. Nein ,reep Chrystel en Chiel allebej, mer ’t waas al te laat . ’t Water kwoom al de kêlder in. Waat ’n eêlendj, wore ze mer inne Hej blieve woeëne, det waas ’n deîl minder stress gewaestj.
