Op zoondig 26 jannewari waas ’t nao lang wachte eindelik zoeëwiêt!
Nao ‘ne kej sjieke jeugd boonte middig bin ich uutgerope as Jeugdpreens van C.V. de Heiknuiters in
Altwieërthej. WAAT WAAS ’T SPANNENDJ EN WAT BIN ICH BLI-J DET EEDEREîN ’T NOOW MOOG WEîTE!

Ich zal mich ieërst effe veûrstelle, al bin ich neteurlik geine onbekindje inne Hej; Ich bin Stan Muijsers en
bin 13 jaor. Ich woeën oppe Herenvennenweeg same met pap (René), mam (Gerjon) en mieën zusje
Inge. Auch hebbe vae 2 hûng Luna & Jenthe, 2 kippe en nog ‘ne hamster van Inge.

Ich zit in groep 8 van Keendjcentrum Altwieërthej.
Mien hobbies zeen voetballe en det doon ich bi-j Brevendia/Altwieërthej JO14-2. Eedere deensdig en
donderdig traîne en ’s-zaoterdigs wedstriêd.

Auch gaon ich d’r gaer met mieëne mountainbike op uut en in de zomer gaon ich gaer us vèsse.
Mieën allergroeëtste passie zeen traktors, en dan veural van ’t merk FORD. Det hep ich van pap mej
gekrege. Ich verzamel miniature en ze passe inmiddels al neet mieër in miene kast! Auch hêlp ich pap
gaer met klusse aan ziene oldtimer, ‘ne FORD 4000! Echt geweldjig! Eeder jaor gaon vae in juli nao
Panninge traktors kieke, en dao zeeje d’r völ!

Wiêter bin ich gaer met mien hâng bezig en hêlp pap gaer met van alles. Dit jaor hep ich met geholpe
met de survivalmiddig vanne buurt. Det waas echt hieël leuk.
Auch hep ich in december mien 2 e junior Muuëlenaarsdiploma gehaaldj. 2 Jaor lânk hep ich ‘ne junior
muuëlenaarscursus gevolgdj bi-j de Sint Annamuuële Kieëntj.
Vastelaovendj viere ving ich auch errig leuk! Ich kiek dao eeder jaor nao uut. Veurig jaor inne jeugdraod
en noow as Jeugdpreens. Hieël speciaal! Daoveûr leep ich eeder jaor met de optocht met met VV de
Knetters en daonao lekker spreenge en hosse inne Paol.

Vör mich begos de vastelaovendj same met miene Adjudânt Harm al op zoondig 27 Oktoeëber. Same
met pap ging ich dae daag nao Spektakel bi-j van Bakel. Echt wat vör mich. Mam en Inge bleeve thoês!
Roond ’n oor of twieë haaje vae ’t gezeen en ginge vae hoêswaarts (dacht ich). Vae ginge richting de
Goudreinet, herstikke um, mer dét haaj ich hielemaol neet door. Pap mos nao de WC en dan zooje vae
auch effe wat dreenke. Ich haaj echt niks inne gate en vae lepe wat wiêter door. Zitte dao aan ’n taofel
allemaol bekindje! Robert Vaes, Anne, Kim, Inge, Guus en mam. Anne vroog of ich wist waat ich heej
kwoom doon, mer ich wist effe hielemaol niks mier gluîf ich. Gae waertj de nowwe Jeugdpreens!!! Waat
’n leuk noets. Allein ’t besef kwoom waal wat later, ich woor echt overdonderdj! Mien ieërste reaksie
woor “leuk”! D’r woorte al wat dinge doorgesproke en ineîns kwoom auch Harm met zien aojers binne!
Miene Adjudânt! Det weurtj ‘ne gezellige tiêd!

Toen mos d’r van alles geregeldj waere. Ich mos ’n orde en devies bedeenke. Aangezeen ich in miene
vri-jjetiêd bekâns altiêd kloompe draag waas det neet zoeë lastig. Det woord “de orde van het
Klûmpke”. De ongerschei-jing mos ontworpe waere, kleî-jer koupe, allemaol stökskes schrieëve en
kedootjes vör de resepsies regele. Bedeenke wi-j ich nao de jeugd boonte middig nao veure woeëj kome
as Jeugdpreens vông ich errig meujelik mer met dânkzeej de inbring van Stefan es ‘t errig leuk gewore.

Op 10 december mochte vae fotoos gaon make. Kleî-jer van harm vergaete! Robert Vaes met piependje
bêndj weer trök nao de Hej. Robert trök. Harm aan ’t aankleî-je wat bleek…, strikske vergaete. Toch
ginge vae de fotos make. Det waas in ’t begeen wat onwinnig mer ’t waas super leuk! Eindelik auch de

mantel um, de steek met vaere op en de Heiknuiter inne hând! Toch jaomer det Harm oppe fotoos stông
zônger strikske, daorum woord geregeldj det vae 16 december nog efkes trök mochte kome vör ‘ne
nowwe fotoshoot. Tjeh ’t resultaat waas d’r wul nao. Vae zeen hieël bli-j met de fotoos. Daonao moste
vae noch ‘ne kleîne angerhâlve maondj oos groeëte geheim good beware want heej en dao woord d’r al
wat gepolsj.

Ich bin d’r noow hieëlemaol klaor vör en hep d’r hieël völ zin in! Eindelik moog ich ut van de dake rope
det ich de Jeugdpreens 2025 bin. Ich hoop det jullie allemaol aanwezig zeen bi-j de aktiviteite di-j d’r dit
jaor georganizeerdj waere. Same met miene Adjudânt Harm, Jeugdvorst Lester en de Jeugdraod wil ich
d’r same met alle groeëte en klein Heiknuiters en Heiknuiterinnekes ‘ne fantastische vastelaovendj van
gaon make.

Dét doon vae onger mien devies: “Klûmp anne kânt, Heiknuiter inne hând”