Poeh waat ‘n hectische maondje. Nao de verboûwing van oos hoês voonge vae waal dét vae ’n vakânsie
verdeentj haaje. In december 3 waeke nao Thailand, op bezeûk bi-j Nadih’s beste vriendin Aniek. Alles
waas uutgestippeldj en gebooktj, dus tiêd vör pizza. De pizza waas besteldj en 5 minute later ging de bel,
dét waas waal hieël snel, mer good, bi-j Domino’s wêjje ’t mer noeëts. Ich probeer de veûrdeur ope te
make, mer op de eîn of ânger meneer löktj dit neet. Met ’n paar handgebare en schrieëwe probeer ich
dudelik te make det de bezörger mer achterum mot kome. As ich de achterdeur ope maak zeen ich
geîne Domino’s jas mer Vorst Robert staon met de voetbaltas van Sem. Toen haaj ich al ’n vermoede….,
uut de voetbaltas kwoom de Preensesteek met de vraog of vae ’t Preensepaar 2025 wille waere?
Entoesiast wore vae drék. Dus nao ’n kort overlêgk hebbe vae neteurlik jao gezagtj!

Zoeë noow wejje wi-j vae gevraogtj zeen, vae zölle os auch nog effe veurstelle. Ich bin Nick Brils, 27 jaor,
gebore en getoge oppe Pastoeër Schippersstraot woeë ich tot 2023 hep gewoeëntj met pap en mam en
broor Glenn. Daonao bin ich same met mien Prinses gaon woeëne oppe Hollandiastraot.

Door de waek bin ich te veenge bi-j BMO Precision Parts in Ni-jwieërt as cad/cam programmeur en 5-
assig fraeser. Mien hobbies zeen voetballe in ‘t 2 e van SV Altwieërthej en ’n pilske dreenke met
kammeraöj.

Naeve mich stieët mien Prinses. De mieëste kinne heur waal, misschien as Jeugdprinses, Jeugdvorst,
Jeugdbegeleider, Borebroeëd of 5 jaor geleeje toen ze nog as Adjudânt heej oppe bühn stong. Ich zal
heur toch nog effe veûrstelle. Nadih Stultiëns, 25 jaor, gebore en getoge net boete de Hej oppe
Bocholterweeg. Heej heet ze tot 2023 gewoeëntj met pap en mam, breûrke Tren en Aod Prinses
Mascha. Naodét vae zeen gaon samewoeëne es ze ’n echte hoêsmös gewore. Nadih wêrktj bi-j Hoera in
de keendjeropvang mer volgtj auch de opleiding tot hormooncoach en hooptj heej uuteindelik met
wiêter te kinne.

Naeve os staon oos Adjudânte Sem, Bart en Rob. Dees keus waas snel gemaaktj. Vae zeen allemoal lid
van VV de Tupkes. Auch zitte vae allemaol in dezelfdje vreendjegroep namelik de lûrpluuj, waat oos orde
es gewore. Lûrpe stieët vör beer dreenke en luuj vör vreendje. Beer dreenke met vreendje, dét gieët
waal good kome dit seizoen!

Op de ôngerschei-jing stieët ‘ne robotêrm, det heet neteurlik te make met mien wêrk bi-j BMO. De
robot het ’t logo vanne ooze groep de Tupkes vast. Langs de robot scheete d’r roeëd gael greûn
veurwêrkpieële aaf. Dees pieële staon vör aod op now 5 jaor geleje woeë ’t allemaol begonne es tösse
mieën Prinses en mich.

Noow wejje waal genog over os, tiêd um ’t fieëst te laote beginne!

En det ónger oos devies: “Gae gaotj ’t belaeve, vae same, alles gaeve!”